Чоң-Алайда өзгөчө кырдаалдардын алдын алуу чаралары күчөтүлөт
Өзгөчө кырдаалдар министри Канатбек Чыныбаев иш сапары менен Чоң-Алай районуна барып, райондук Өзгөчө кырдаалдар бөлүмүнүн ишмердүүлүгү менен таанышты.
Маалыматка ылайык, министр өздүк курам менен жолугуп, кызмат өтөө шарттарын жана бөлүмдүн материалдык-техникалык камсыздалышын көрүп чыкты.
Иш сапардын алкагында Чоң-Алай райондук мамлекеттик администрациясынын жана жергиликтүү өз алдынча башкаруу органдарынын өкүлдөрү менен жолугушуу өтүп, райондогу өзгөчө кырдаалдардын алдын алуу, коопсуздукту камсыздоо маселелери талкууланды.
Ошондой эле Канатбек Чыныбаев Жар-Башы жана Дароот-Коргон айылдарындагы Кызыл-Суу дарыясынын жээгинде жээк бузулуу коркунучу жаралган тилкелерди жеринен көрдү.
Жыйынтыгында тиешелүү кызматтарга кооптуу аймактарда алдын алуу жана коргоо иштерин күчөтүү боюнча тапшырмалар берилди.
