Нарында жайытка зыян келтирген жарандарга 45 миң сом айып салынды
Нарын районунун Учкун айыл аймагында жайыт жерлерди максатсыз пайдалануу жана зыян келтирүү фактылары аныкталды. Бул тууралуу Айыл чарба министрлигинин басма сөз кызматы билдирди.
Жерди жана сууну көзөмөлдөө боюнча кызматтын аймактык башкармалыгы жүргүзгөн текшерүүдө малчылар "Жашыл Учкун" муниципалдык ишканасы бекиткен тартипти сактайбай, өрөөндөгү жаздоо жана кыштоо жайыттарына мал жаюуну улантып келишкени белгилүү болду.
Аталган мыйзам бузуулар боюнча "Укук бузуулар жөнүндө" кодекстин 252-беренесине ылайык, жарандарга жалпы 45 миң сом өлчөмүндө айып салынды.
Адистер жайыттарды белгиленген тартипте пайдалануу, алардын зыянга учурашына жол бербөө жана талаптарды сактоо зарылдыгын эскертти.
