Ош облусу менен Иркутск облусу кызматташат
6-августта Ысык-Көл облусунун Бостери айылында президенттин Ош облусундагы ыйгарым укуктуу өкүлү Аманкан Кенжебаев менен Россия Федерациясынын Иркутск облусунун губернатору Игорь Кобзевдин эки тараптуу жолугушуусу болуп өттү. Бул тууралуу облустук ыйгарым өкүлчүлүктөн билдиришти.
Жолугушуунун жүрүшүндө тараптар кыргыз-орус стратегиялык өнөктөштүгүнүн алкагында аймактар аралык кызматташтыкты мындан ары чыңдоо маселелерин талкуулашып, соода-экономикалык, инвестициялык, өнөр жай, айыл чарба, кайра иштетүү, логистика, туризм, билим берүү, саламаттык сактоо жана кадрларды даярдоо багыттарындагы кызматташуу мүмкүнчүлүктөрүнө өзгөчө көңүл бурушту.
Жолугушуунун жыйынтыгында Ош облусу менен Иркутск облусунун ортосунда кызматташуу жөнүндө макулдашууга кол коюлду.
Аталган документ эки аймактын ортосундагы өз ара пайдалуу кызматташтыкты өнүктүрүүгө, ишкердик байланыштарды кеңейтүүгө, биргелешкен инвестициялык долбоорлорду ишке ашырууга жана тажрыйба алмашууга бекем негиз түзөт.
