Соттук-генетикалык экспертиза боюнча адистер биринчи жолу сертификацияланды
Кыргызстанда соттук эксперттерди "Адамдын ткандарынын жана бөлүнүп чыккан заттарынын молекулярдык-генетикалык изилдөөсү жана биологиялык туугандыкты аныктоо" багыты боюнча алгачкы жолу сертификациялоо өткөрүлдү.
Соттук-эксперттик кызматынын маалыматына ылайык, сертификацияга Соттук-эксперттик кызматтын, ИИМдин Эксперттик-криминалистикалык кызматынын жана УКМКнын эксперттери катышты.
Алар бир айлык квалификацияны жогорулатуу курсунан өтүп, соттук молекулярдык генетиканын заманбап ыкмаларын, ДНК-изилдөөлөрдү жүргүзүүнүн өзгөчөлүктөрүн үйрөнүштү.
Окуу ИИМдин Эксперттик-криминалистикалык кызматынын ДНК-лабораториясынын базасында өткөрүлүп, ага Орусиянын ИИМинин Эксперттик-криминалистикалык борборунун адистери да келишти.
Курстун жыйынтыгында квалификациялык сынактар өткөрүлүп, аны ийгиликтүү тапшырган эксперттерге компетенттүүлүк күбөлүктөрү берилди.
Соттук молекулярдык-генетикалык экспертиза боюнча адистерди даярдоо соттук изилдөөлөрдүн сапатын жогорулатууга жана бул багыттагы эксперттик мүмкүнчүлүктөрдү кеңейтүүгө шарт түзөт.
