Сыны айылында 178 млн сомго каржыланган мектеп курулуп бүттү
Жалал-Абад облусунун Аксы районундагы Сыны айылында 375 орундуу жаңы мектептин курулушу аяктады. Бул тууралуу Курулуш министрлигинин басма сөз кызматы билдирди.
Маалыматка ылайык, долбоор республикалык казынадан каржыланып, анын жалпы наркы 178 млн сомду түздү.
Мектептин курулушу 2025-жылы июлда башталган. Бүгүнкү күндө эки кабаттуу заманбап билим берүү имараты толугу менен курулуп бүтүп, айланасы көрктөндүрүлүп жатат.
Жалпы аянты 2996 чарчы метрди түзгөн мектепте окуу класстары, лаборатория, китепкана, ашкана, жыйындар залы, эмгек кабинеттер, дарыгердин бөлмөсү жана спорт зал каралган.
Жаңы окуу жылынын башталышы менен пайдаланууга берилери күтүлүп жаткан мектепте эки нөөмөттө 750дөн ашык окуучу билим ала алат.
с
