Быйыл 77 миңден ашуун жаран иш менен камсыз кылуу кызматына кайрылды
Эмгек, социалдык камсыздоо жана миграция министрлигинин маалыматына ылайык, 2026-жылдын 1-июлуна карата иш менен камсыз кылуу кызматтарына 77 миң 551 жаран кайрылды.
Алардын 52 миң 807сине эмгек мыйзамдары, жумушка орношуу мүмкүнчүлүктөрү, кесиптик окутуу жана кайра даярдоо багыттары, ошондой эле кесип тандоо боюнча кеңеш берилген.
Натыйжада иш менен камсыз кылуу кызматтарынын жардамы менен отчеттук мезгилде 7 миң 106 жумушсуз жаран жумуш менен камсыз болгон. Алардын ичинен 4 миң 87си аялдар, 3 миң 744ү жаштар.
Ошондой эле жарандарды кесипке багыттоо иштери жүргүзүлүүдө. Учурда мындай борборлор Бишкек, Каракол, Нарын, Талас, Жалал-Абад, Өзгөн, Ош жана Баткен шаарларында, ошондой эле Чүй облусунун Сокулук районунда иш алып барууда.
Мындан тышкары, жумушсуз жарандарды кесиптик окутууга жөнөтүү иштери уланып жатат. Быйылкы көрсөткүч боюнча 3 миң 451 жаран кесиптик окууга жиберишти.
Белгиленгендей, алар талап кылынган адистиктер боюнча окуп жатышат. Алардын арасында компьютер оператору, соода агенти, ашпоз, косметолог, чач тарач, бухгалтер, айдоочу, ширетүүчү, тигүүчү жана башка кесиптер бар.
Ошондой эле иш менен камсыз кылуу кызматтары убактылуу жумушка, тагыраагы 9 миң 669 жумушсуз жаран акы төлөнүүчү коомдук иштерге жөнөтүштү.
