Коррупция жана алдамчылык боюнча айыпталган компаниялардын ээлери тендерге катыша албайт
Кыргызстанда “Мамлекеттик сатып алуулар жөнүндө” мыйзамга өзгөртүүлөр киргизилип, алардын негизги бөлүгү 2027-жылдын 1-январынан тартып күчүнө кирет.
Жаңы эрежелерге ылайык, мамлекеттик сатып алуулардын ыкмасы үчөө гана болот: ачык тендер, баа сунуштарын суроо жана бир булактан сатып алуу.
Мыйзам коррупцияга каршы талаптарды да күчөтөт. Коррупция жана алдамчылык үчүн соттолгон компаниялар тендерлерге катыша албайт.
Ошондой эле компаниялар өздөрүнүн чыныгы ээлери тууралуу маалымат берүүгө милдеттүү болот. Жакын туугандарга байланыштуу кызыкчылыктардын кагылышына жол берилбейт.
Мамлекеттик органдар сатып алууларды үч жылга алдын ала пландап, планда жок товарларды же кызматтарды сатып ала алышпайт. Өзгөчө кырдаалдар үчүн гана өзгөчө тартип сакталат.
Мындан тышкары, сатып алуу комиссиялары тандоо аркылуу түзүлүп, алардын ишине коомчулуктун өкүлдөрү жана эксперттер катыша алат. Эгер тендерди уткан компания келишимден баш тартса, келишим рейтингде кийинки орунду ээлеген катышуучу менен түзүлөт.
Жаңы мыйзамга ылайык, 2027-жылдан тартып тендерлерде компаниялардын ээлери, алардын байланышы, сунушталган баалар жана келишимдердин аткарылышы мурдагыдан да катуу көзөмөлдөнөт.
