Маданият министрлиги жарандарды “Таш-Рабат” комплексине барбай турууга чакырат
Маданият, маалымат жана жаштар саясаты министрлиги “Таш-Рабат” тарыхый-архитектуралык комплексинин аймагында жүргүзүлүп жаткан оңдоо иштерине байланыштуу жарандарга, туристтерге, туризм тармагынын өкүлдөрүнө жана жалпыга маалымдоо каражаттарына кайрылуу кылды.
Учурда комплекстин аймагында 2023–2027-жылдарга карата “Көөнө тарых сырлары” мамлекеттик программасынын алкагында комплекстүү оңдоо иштери жүргүзүлүүдө.
Жүргүзүлүп жаткан иштердин негизги максаты – тарыхый эстеликтин сакталышын камсыз кылуу, анын конструкцияларын бекемдөө, коопсуз пайдаланууга шарт түзүү жана келечек муундарга жеткирүү.
Тарыхый-маданий мурас объекттерин калыбына келтирүү – эл аралык жана улуттук талаптарды так сактоону, кесипкөй адистердин катышуусун, ошондой эле атайын технологияларды жана материалдарды колдонууну талап кылган татаал илимий-практикалык процесс. Ушуга байланыштуу иштер этап-этабы менен жүргүзүлүп, 2027-жылга чейин улантылат.
Оңдоо иштеринин жүрүшүндө комплекстин аймагында курулуш техникалары, атайын жабдуулар жана жумушчу топтор иш алып барууда. Жарандардын коопсуздугун камсыз кылуу жана оңдоо иштерин сапаттуу жүргүзүүгө шарт түзүү максатында айрым тилкелер убактылуу тосулуп, аларга кирүүгө чектөө коюлган.
Ушуга байланыштуу Министрлик жарандарды жана туристтердиоңдоо иштеринин негизги этаптары аяктаганга чейин “Таш-Рабат”комплексине баруудан убактылуу карманууга чакырат.
Ошондой эле туристтик компаниялардан жана экскурсоводдордон туристтик маршруттарды пландоодо киргизилген чектөөлөрдү эске алуу жана туристтерге алдын ала маалымат берүүнү өтүнөт.
