"Кыргызфармация" Кытайдын тажрыйбасын киргизет
"Кыргызфармация" мамлекеттик ишканасынын директору Акылбек Туратбек уулу жетекчилиги менен Кыргызстандын делегациясы Кытайдын Ухань шаарында иш сапары менен жүрөт. Бул тууралуу аталган ишканадан билдиришти.
Маалыматка ылайык, делегация курамында Саламаттык сактоо министрлигинин, Мамлекеттик мүлктү башкаруу агенттигинин жана "Кыргызфармация" ишканасынын өкүлдөрү бар.
Иш сапар "Кыргызфармациянын" жаңы фармацевтикалык комплексинин капсуласы салынгандан кийинки уландысы болду. Сапардын максаты - заманбап кампа логистикасын автоматташтыруу технологияларын үйрөнүп, Кыргызстанда киргизүү.
Ухань шаарында дары-дармектерди роботтоштурулган сактоо жана ташуу, автоматтык сорттоо, санариптик кампа башкаруу жана сактоо шарттарын көзөмөлдөө системалары каралууда. Бул технологияларды курулуп жаткан мамлекеттик фармацевтикалык комплекске колдонуу пландалууда.
Ошондой эле мамлекеттик-жеке өнөктөштүк алкагында жеке инвестор тартуу маселеси каралууда. Алдын ала Бишкек жана Ош шаарларында аянты 10 миң чарчы метрден болгон эки ири автоматташтырылган логистикалык комплекс куруу каралган.
Долбоор өлкөнүн түндүк жана түштүгүндө заманбап кампалар түзүүгө, GDP стандарттарына ылайык дары-дармектин зарыл запасын сактоого жана аймактарды үзгүлтүксүз камсыздоого мүмкүндүк берет. Кампалар GDP талаптарына жооп берген өздүк инфраструктурасы жок ата мекендик өндүрүүчүлөр үчүн да жеткиликтүү болот.
Мамлекеттик комплекс жана жеке инвестиция менен курула турган эки объект бирдиктүү логистикалык системаны түзүп, өлкөнүн дары-дармек коопсуздугун камсыздайт.
