Ош менен Бразилия кызматташтыктын жаңы барагын ачууда
Бүгүн Ош шаарынын мэринин орун басары Масуда Айдарбекова Бразилиянын Кыргызстандагы Элчиси Марсел Фортуна Биато менен жолугушту. Бул тууралуу мэриянын маалымат кызматы кабарлады.
Маалыматка караганда, жолугушууда соода-экономика, инвестиция, айыл чарба, билим берүү, энергетика жана заманбап технологиялар боюнча кызматташуу талкууланды.
Айыл чарбада заманбап технологияларды киргизүү, тажрыйба алмашуу жана айыл чарба техникаларын жергиликтүү өндүрүшкө киргизүү каралды. Бразилиялык ишкерлер октябрда Астанадагы агрардык көргөзмөгө катышып, Кыргызстанда өндүрүш ачууга кызыкдар экени айтылды.
Билим берүү багытында студенттерди эл аралык долбоорлорго тартуу жана Enactus кыймылы алкагында кызматташуу көтөрүлдү.
Энергетикада Бразилиянын гидроэнергетика тажрыйбасын бөлүшүү, суу ресурстарын натыйжалуу пайдалануу жана ирригация боюнча кызматташуу мүмкүнчүлүктөрү талкууланды. Ош шаарына инвестиция тартуу жана биргелешкен долбоорлорду ишке ашыруу боюнча пикир алмашуу болду.
Жыйынтыгында тараптар кызматташтыкты улантууга макулдашты.
