Жалал-Абадда көп кабаттуу үйдүн курулушунда мыйзам бузуулар аныкталды
Мамлекеттик архитектура-курулуш көзөмөлдөө департаментинин Жалал-Абад региондук башкармалыгы шаардагы көп кабаттуу турак жайга текшерүү жүргүздү. Бул тууралуу Курулуш министрлигинин басма сөз кызматы билдирди.
Маалыматка ылайык, текшерүү Байзаков көчөсү, 46 дарегинде курулуп жаткан объектте өткөрүлүп, техникалык талаптардын бузулганы аныкталды.
Белгиленгендей, курулуш иштери бекитилген долбоордук документациядан четтөө менен жүргүзүлгөн. Ошондой эле турак жайдын бир блогунун тиешелүү уруксат берүүчү документтери болгон эмес.
Аныкталган мыйзам бузуулар боюнча курулуш иштерин жүргүзүп жаткан "Меркит Курулуш" ЖЧКсына карата акт түзүлүп, 200 миң сом өлчөмүндө айып пул салынды.
Ошондой эле мыйзам бузуулар толук жоюлганга чейин объекттеги курулуш иштери убактылуу токтотулду.
