Министрлик: Тарых музейинин эки кабаты Кытайга берилгени тууралуу маалымат жалган
Желеде Улуттук тарых музейинин 4-5-кабаттары Кытай тарапка өткөрүлүп берилгени тууралуу тараган маалыматтын чындыкка дал келбесин Маданият, маалымат жана жаштар саясаты министрлиги билдирди.
Министрликтин маалыматына караганда, музейдин эч бир бөлүгү чет өлкөлүк мекемелерге менчикке, ижарага же туруктуу пайдаланууга берилген эмес.
Белгилегендей, “Гармония сулуулукту жаратат: Байыркы Кытай цивилизациясынын көркөм өнөр көргөзмөсү” убактылуу 15-августтан 15-ноябрга чейин өтөт.
Көргөзмө музейдин туруктуу экспозициялык залдарында эмес, эл аралык жана убактылуу көргөзмөлөрдү өткөрүүгө арналган бош аянтчаларда уюштурулат. Ушуга байланыштуу музейдин туруктуу экспозициялары кадимки тартипте ишин улантат.
Министрлик 2025-жылы Пекин шаарындагы Кытайдын Улуттук музейинде Кыргызстандын Улуттук тарых музейинин көчмө көргөзмөсү уюштурулуп, анда кыргыз элинин тарыхын жана маданий мурасын чагылдырган экспонаттар коюлганын эске салды.
Маалыматта Тяньцзинь музейи да АКШ, Беларусь, Испания, Латвия, Казакстанда жана башка өлкөлөрдө убактылуу көргөзмөлөрдү үзгүлтүксүз уюштуруп келери айтылат.
Министрликтин билдирүүсүндө, Бишкекте өтө турган көргөзмө дүйнөлүк музей кызматташтыгынын алкагындагы маданий долбоор болуп саналат. Ал Тарых музейинин макамын, укуктук статусун өзгөртпөйт жана имараттын кандайдыр бир бөлүгүн башка тарапка өткөрүп берүү дегенди билдирбейт.
