Ошто 13,5 млн еврого эне-балага арналган медициналык борбор курулуп жатат
Ош шаарында эне-бала саламаттыгын коргоого багытталган Перинаталдык борбордун курулушу башталды. Бул тууралуу Саламаттык сактоо министрлигинин басма сөз кызматы билдирди.
Маалыматка ылайык, долбоор Германиянын өнүктүрүү банкынын (KfW) 13,5 млн евро өлчөмүндөгү гранттык каражатынын эсебинен ишке ашырылууда.
Аталган борбор 249 орунга ылайыкталып, кош бойлуу аялдарга, төрөттөн кийинки энелерге жана ымыркайларга сапаттуу жана заманбап медициналык жардам көрсөтүүгө мүмкүнчүлүк түзөрү айтылды.
Имарат Ош облустар аралык бириккен клиникалык ооруканасынын аймагындагы курулуп жатат. Объектте күн сайын 30дан 70ке чейин адис иш алып барууда. Учурда курулуш иштеринин даярдыгы 10%ды түзөт.
Мекемени 2028-жылдын төртүнчү чейрегине чейин куруп бүтүү мерчемделген.
