Бишкекте тынчтык мыйзамына жараша коомдук тартипти сактоо көзөмөлдөнүүдө
Бишкек шаарынын ИИББнын кызматкерлери Кыргыз Республикасынын мыйзамдарынын талаптарын, анын ичинде тынчтыкты жана коомдук тартипти сактоону камсыз кылуу боюнча түшүндүрүү иштерине багытталган профилактикалык иш-чараларды өткөрүшүүдө.
Шаардык милициянын маалыматына ылайык, иш-чаралардын жүрүшүндө милиция кызматкерлери борбор калаадагы бир катар түнкү жана көңүл ачуучу жайларга барып, алардын ээлери, администраторлору жана кызматкерлери менен түшүндүрүү иштерин жүргүзүшүүдө. Өзгөчө түнкү убакта тынчтыкты сактоо, катуу музыка коюуга, ызы-чууга жана жарандардын тынчтыгын бузган башка аракеттерге жол бербөө зарылдыгына көңүл бурулууда.
Мындай профилактикалык иш-чаралар борбор калаанын аймагында туруктуу негизде өткөрүлүп, укук бузуулардын алдын алууга, коомдук тартипти жана жарандардын тынчтыгын камсыз кылууга багытталган.
Анын жүрүшүндө милиция кызматкерлери Кыргыз Республикасынын мыйзамдарынын талаптарын бузгандыгы үчүн жоопкерчилик каралгандыгын эскертишет.
Бишкек шаарынын ИИББы жарандарды КРнын мыйзамдарынын талаптарын сактоого, тынчтыкты жана коомдук тартипти бузбоого, ошондой эле коомдук жайларда тамеки тартууга тыюу салуу талаптарын аткарууга чакырууда.
