Кыргызстан менен Россияда SIM-картаны алмаштырбай байланышта болуу мүмкүнчүлүгү түзүлөт
Кыргызстан менен Россияда бирдиктүү SIM-карта системасын ишке киргизүү пландалууда. Бул тууралуу журналисттерге Россия-кыргыз өнүгүү фондунун башкармалыгынын төрагасы Артем Новиков билдирди.
Долбоорду Beeline Кыргызстан жана Билайн Россия Россия-кыргыз өнүгүү фондунун каржылык колдоосу менен ишке ашырмакчы.
Билдирүүгө караганда, бул долбоор ишке кирсе, Кыргызстан менен Россиянын ортосунда жүргөндө абонентке SIM-картасын алмаштыруунун зарылдыгы болбойт. Башкача айтканда, Кыргызстанда колдонуп жүргөн байланыш кызматтарын Россияда да, кайра Кыргызстанга келгенде да ошол эле SIM-карта аркылуу пайдаланууга мүмкүнчүлүк түзүлөт.
Долбоордун алкагында эки өлкөдөгү операторлордун мобилдик байланыш, акча которуу жана санариптик кызматтары бириктирилиши пландалууда. Бул өзгөчө Россияда иштеген кыргызстандыктар үчүн ыңгайлуу болмокчу. Мисалы, чет өлкөгө чыкканда жаңы SIM-карта сатып алуу, номер алмаштыруу же байланыш кызматтарын кайра жөндөө зарылдыгы азаймакчы.
Артем Новиковдун айтымында, бул долбоордун кийинки этабында ушундай эле система Өзбекстан жана Тажикстанда да ишке киргизилиши пландалууда.
Белгилей кетсек, “бесшовная SIM-карта” деген түшүнүк SIM-картаны физикалык жактан алмаштырбай, эки өлкөнүн мобилдик тармактарынын кызматтарын бирдиктүү система аркылуу пайдалануу мүмкүнчүлүгүн билдирет.
