Бишкекте даректүү тасмалардын эл аралык кинофестивалы болот
10-сентябрдан 14-сентябрга чейин Бишкек шаарында көрүнүктүү даректүү кинолордун режиссеру Альгимантас Видугиристин элесине арналган II Эл аралык UmutDoc даректүү тасмалардын кинофестивалы өтөт. Беш күнгө созулган фестивалда даректүү кинолор көрсөтүлүп, кинорежиссерлор менен жолугушуулар, мастер-класстар, бет ачаарлар, питчинг, шоукейс жана кесиптик талкуулар болот.
Иш-чаранын уюштуруучулары фестивалдын негизги аянтчалары – OloloErkindik жана “Ала-Тоо” кинотеатрында боло тургандыгын, бардык иш-чараларга кирүү акысыз экенин билдиришти.
Маалыматка ылайык, фестивалдын ачылыш аземи 10-сентябрда саат 18:30да “Ала-Тоо” кинотеатрында башталып, анда А. Видугиристин “Нарын күндөлүгү” жана Т. Ибрагимовдун “Альгимантас Видукыргыз - кинорежиссёрдун аялынын сырын ачышы” аттуу тасмалардын бет ачаары менен коштолот.
Андан кийинки күндөрү көрүүчүлөрдү UmutDocтун негизги кинопрограммасы: кинорежиссёрлор менен талкуулар жана жолугушуулар коштолгон толук метраждуу жана кыска метраждуу даректүү тасмалардын сынактык көрсөтүүлөрү күтөт.
Ар бир сынакта “Эң мыкты тасма”, “Эң мыкты режиссер” номинацияларын лауреаттары аныкталат, ошондой эле “Калыстар тобунун атайын сыйлыгы” жана “Көрүүчүлөрдүн сүймөнчүлүгү үчүн сыйлык” тапшырылат. New York Film Academy Kazakhstan колдоосу менен фестивалдын байге фондунун жалпы суммасы 80 000 АКШ доллары менен толукталат.
Ошондой эле фестивалда биринчи жолу Algimantas Vidugiris Award сыйлыгы тапшырылмакчы.
