Чолпон-Атадагы 10 миң орундуу ат майдан жаңыланды
Чолпон-Ата шаарындагы ат майданында капиталдык оңдоо жана көрктөндүрүү иштери толугу менен аяктады. Бул тууралуу Курулуш, архитектура жана турак жай-коммуналдык чарба министрлиги билдирди.
2026-жылы башталган оңдоо иштеринин алкагында VIP-зона, конок бөлмөлөрү, трибуналар, административдик жайлар, жер төлө жана унаа токтотуучу жайлар жаңыланды. Ошондой эле инженердик тармактар оңдолуп, аймак көрктөндүрүлдү.
Трибуналардагы отургучтар жана керамогранит жабуулары, башкы кире бериштеги граниттер, чатыр жабуулары жана брусчаткалар жаңыртылды. Суу түтүктөрү жана санитардык түйүндөр алмаштырылып, фонтандар оңдолду.
Долбоор республикалык бюджеттин эсебинен каржыланган.
Учурда ат майданында Дүйнөлүк көчмөндөр оюндарына даярдык көрүлүп, сахна орнотуу жана башка уюштуруу иштери жүргүзүлүүдө.
Маалыматка ылайык, Чолпон-Ата ат майданы 10 миң көрүүчүгө ылайыкталган. Анын тарыхы 1930-жылдардан башталып, объект 2014-жылы I Дүйнөлүк көчмөндөр оюндарына карата оңдолгон, ал эми 2018-жылы толук жаңыланган.
