Ысык-Көл менен Токтогул суу сактагычында мыйзамсыз балык уулоого каршы рейд өттү
Ысык-Көл жана Токтогул суу сактагычында жүргүзүлгөн рейддердин жүрүшүндө жалпы узундугу 550 метрге жакын синтетикалык балык уулоочу тор суудан чыгарылды. Бул тууралуу Жаратылыш ресурстары, экология жана техникалык көзөмөл министрлиги билдирди.
Ысык-Көл акваториясында инспекторлор узундугу болжол менен 400 метрди түзгөн төрт эски синтетикалык балык уулоочу торду алып чыгышкан.
Ушундай эле рейд Токтогул суу сактагычында жүргүзүлүп, анда узундугу 150 метр болгон синтетикалык балык уулоочу тор табылган. Тор суудан чыгарылып, жараксыз абалга келтирилди.
Министрликтин маалыматына ылайык, рейддер мыйзамсыз балык уулоонун жана браконьерликтин алдын алуу, суу биоресурстарын коргоо максатында улантылат.
