Бишкекте "Ырыс-Ордо" конгресс-борбору пайдаланууга берилди
Президент Садыр Жапаров кечээ Бишкек шаарындагы "Ырыс-Ордо" мамлекеттик конгресс-борборунун ачылыш аземине катышты. Бул тууралуу Президенттик администрациянын басма сөз кызматынан билдиришти.
Мамлекет башчысы иш-чарада сөз сүйлөп, жаңы конгресс-борбор өлкөнүн өсүп жаткан мүмкүнчүлүгүн жана өнүгүүгө болгон умтулуусун чагылдырган заманбап Кыргызстандын жаңы символдорунун бири болорун белгиледи.
Президенттин айтымында, "Ырыс-Ордо" Шанхай Кызматташтык Уюму, Жамааттык Коопсуздук Келишими Уюму, Евразия Экономикалык Биримдиги, Түрк мамлекеттеринин уюму сыяктуу эл аралык уюмдардын саммиттерин, глобалдык форумдарды жана башка ири иш-чараларды өткөрүүгө мүмкүнчүлүк берет.
Садыр Жапаров "Ырыс-Ордо" конгресс-борбору жана "Бишкек Арена" стадиону толугу менен мамлекеттик каражаттын эсебинен курулганын белгиледи.
"Ырыс-Ордо" 39 миң чарчы метрден ашык аянтты ээлеп, бир учурда 2 миңден ашык конокту кабыл ала алат. Борбордо 1238 орундуу "Курултай" конференц-залы, 1000 орундуу банкет залы, 235 орундуу пресс-зал жана жогорку деңгээлдеги жолугушууларды өткөрүүгө арналган заманбап залдар жайгашкан.
Мындан ары бул жерде Элдик Курултайдын жыйындары, мамлекет башчыларынын деңгээлиндеги жолугушуулар, эл аралык форумдар, ошондой эле ири коомдук жана маданий иш-чаралар өткөрүлөт.
