Кара-Сууда сапатсыз асфальт төшөгөн компанияга айып пул салынды
Кара-Суу шаарында жол куруу иштеринин сапатына байланыштуу жарандардын кайрылуусунун негизинде текшерүү жүргүзүлдү. Бул тууралуу Курулуш, архитектура жана турак жай-коммуналдык чарба министрлиги билдирди.
Текшерүүнүн жыйынтыгында асфальт төшөө иштери белгиленген талаптарга жооп бербей турганы аныкталды. Айрым жерлерде асфальт катмары сыйрылып, көчүп жатканы жана курулуш учурунда технологиялык талаптар сакталбаганы белгиленди.
Аталган жолдор Аматов көчөсүндөгү №2, 4, 6, 8 жана 86 көп кабаттуу үйлөрдүн аймагын көрктөндүрүү жана инфраструктурасын жакшыртуу долбоорунун алкагында курулууда.
Аныкталган кемчиликтер боюнча жол куруу иштерин жүргүзгөн "Ош Спец Строй" ЖЧКсына акт түзүлүп, аларды белгиленген мөөнөттө жоюу боюнча көрсөтмө берилди.
Мындан тышкары, компанияга 200 миң сом айып салынып, административдик чара көрүлдү.
