Бишкекте өзгөчө балдар үчүн ат үстүндөгү терапия уюштурулууда
Бишкекте ден соолугунун мүмкүнчүлүгү чектелген балдар үчүн иппотерапия боюнча сабактар өткөрүлүүдө. Бул тууралуу Бишкек шаарынын мэриясы билдирди.
Сабактар 25-июндан 15-сентябрга чейин Ататүрк атындагы сейил бакта өтөт. Аларды спорт инструкторлору өткөрүп, балдар ата-энелеринин же мыйзамдуу өкүлдөрүнүн коштоосунда катышат.
Маалыматка ылайык, күн сайын иппотерапия сабактарына орточо 10–15 бала келет. Беш күндүн ичинде катышуучулардын саны болжол менен 65–70 балага жетет.
Иппотерапия адаптацияланган ат минүүгө жана ат менен өз ара аракеттенүүгө негизделген. Мындай сабактар балдардын кыймыл-аракет активдүүлүгүн, координациясын жана жалпы моторикасын өнүктүрүүгө жардам берет. Ошондой эле алардын эмоционалдык абалына жана социалдык адаптациясына оң таасирин тийгизет.
