Бишкектеги сейил бактарда ит сейилдетүүчү атайын жайлар түзүлөт
Бишкектеги сейил бактарда жана скверлерде үй жаныбарларын сейилдетүү үчүн атайын жайларды уюштуруу каралат. Бул тууралуу Бишкек мэриясы билдирди.
Шаар мэри Айбек Жунушалиев Иманалы Айдарбеков көчөсүнүн (мурдагы Жаш Гвардия бульвары) Жоомарт Бөкөнбаев көчөсүнөн Жибек Жолу проспектисине чейинки бөлүгүндө жүрүп жаткан реконструкциялоо иштери менен таанышты.
Текшерүү учурунда мэр сейил бактарды жана скверлерди реконструкциялоодо үй жаныбарларын сейилдетүү үчүн атайын жайларды сөзсүз караштырууну тапшырды. Ошондой эле иттерди сейилдетүү эрежелери жазылган маалыматтык тактайчаларды орнотуу зарылдыгын белгиледи.
"Шаарда үй жаныбарларын багып жүргөндөр көп экенин көрүп жатабыз. Алар үчүн тиешелүү шарттарды түзүшүбүз керек", — деди Айбек Жунушалиев.
Реконструкциянын алкагында жөө жүргүнчүлөр үчүн тротуарларды жана ирригациялык тармакты жаңылоо, бордюрларды орнотуу, балдар жана спорт аянтчаларын куруу каралган. Мындан тышкары, аймак жашылдандырылып, тамчылатып сугаруу системасы уюштурулат.
Курулуш иштерин Бишкек мэриясынын Капиталдык курулуш башкармалыгы жүргүзүүдө. Подряддык уюм — "АЖК Строй" ЖЧКсы.
