Көчмөндөр оюндарына билеттерди кайдан сатып алууга болот?
VI Дүйнөлүк көчмөндөр оюндарынын иш-чараларына билеттерди онлайн жана расмий кассалардан сатып алууга болот. Бул тууралуу Көчмөндөр оюндарынын медиа штабы билдирди.
Электрондук билетти nebs.gov.kg сайты аркылуу сатып алууга болот. Ал үчүн сайттан каттоодон өтүп, керектүү иш-чараны, секторду жана орунду тандап, төлөм жүргүзүү зарыл. Төлөм Visa, MasterCard, "Элкарт" карталары жана ELQR аркылуу кабыл алынат.
Офлайн билет сатуу 27-августтан башталат. Билеттер Чолпон-Ата шаарындагы "Рух Ордо" маданий-этнографиялык комплексинде, ипподромдогу эки расмий кассада жана Бостери айылындагы "Дордой Номад" амфитеатрында сатылат.
Иш-чара өтүүчү жайга кирүүдө электрондук же кагаз түрүндөгү билет көрсөтүлүшү керек. Электрондук билетти алдын ала смартфонго сактап алуу сунушталат.
Белгилей кетсек, Кырчын капчыгайындагы иш-чараларга жана Курманжан датка атындагы Көчмөндөр цивилизациясынын музейине кирүү акысыз.
