Ошто коопсуздук талабын бузган компанияга 200 миң сом айып салынды
Ош шаарында курулуп жаткан 12 кабаттуу турак жайда курулуш талаптарынын бузулушу аныкталып, компанияга 200 миң сом айып салынды. Бул тууралуу Курулуш, архитектура жана турак жай-коммуналдык чарба министрлиги билдирди.
Маалыматка ылайык, Мамыров көчөсү, 54 дарегиндеги объектти текшерүү учурунда турак жай үчүн казылган котлован курулуш аянтынын тосмосунан чыгып, үчүнчү жактар үчүн кооптуу абал жаратканы аныкталган.
Мындан улам "Найман Ийгилик" ЖЧКсына 200 миң сом айып салынып, курулуш талаптарын так сактоо жана аныкталган кемчиликтерди жоюу талабы коюлган.
Учурда курулуш объектиндеги кемчиликтер толук жоюлуп, аймактагы тосмо талапка ылайык бекемделди.
