Бишкекте үч күнгө курулуш иштерине чектөө киргизилди
Бишкек шаарында 30-августтан тартып үч күнгө курулуш-монтаждоо иштерин жүргүзүүгө жана оор атайын техникаларды пайдаланууга убактылуу чектөө киргизилди. Бул тууралуу Курулуш, архитектура жана турак жай-коммуналдык чарба министрлиги билдирди.
Мындай чара Шанхай кызматташтык уюмунун саммитине жана VI Дүйнөлүк көчмөндөр оюндарына байланыштуу кабыл алынды.
Бул маселе Мамлекеттик архитектура-курулуш контролдоо департаменти менен Бишкектеги курулуш компанияларынын өкүлдөрүнүн жыйынында талкууланды.
Чектөө эл аралык иш-чаралар өтүп жаткан учурда шаардагы коопсуздукту жана коомдук тартипти сактоо, ошондой эле транспорттук, инженердик жана энергетикалык инфраструктуралардын үзгүлтүксүз иштешин камсыз кылуу максатын көздөйт.
Жыйында курулуш объектилеринде атайын техникаларды туура пайдалануу, инженердик жана энергетикалык коммуникацияларга зыян келтирбөө жана коопсуздук талаптарын сактоо маселелерине да көңүл бурулду.
Энергетикалык көзөмөл органдарынын жана "Кыргызстан улуттук электр тармагы" ААКтын өкүлдөрү курулуш компанияларын энергетикалык объектилерге жакын аймактарда иш жүргүзүүдө өзгөчө этият болууга чакырышты.
