Кочкордо 500 орундуу жаңы мектеп курулду
Нарын облусунун Кочкор районундагы Кочкор айылында И. Арабаев атындагы 500 орундуу жаңы мектептин курулушу аяктады. Бул тууралуу Курулуш, архитектура жана турак жай-коммуналдык чарба министрлиги билдирди.
Мектептин курулушу 2023-жылдын октябрында башталып, республикалык бюджеттен каржыланган. Учурда объект толугу менен бүткөрүлүп, жаңы окуу жылында пайдаланууга берүүгө даяр.
Үч кабаттуу мектептин жалпы аянты 4 миң 136 чарчы метрди түзөт. Анда окуу класстары, лаборатория, китепкана, ашкана, компьютердик класс, эмгек кабинети, медициналык бөлмө, жыйындар жана спорт залдары каралган.
Мектептин аймагында футбол, волейбол жана баскетбол аянтчалары, ошондой эле машыгуу үчүн атайын аянтча курулган.
Жаңы мектептин ачылышы окуучулар үчүн заманбап шарттарды түзүп, мектептеги орун тартыштыгын азайтууга мүмкүндүк берет.
