“Күрүч өндүрүү жана кайра иштетүү” агрокластерине 60 миллион сом берилди
28-августта министрдин орун басары Мирбек Дүйшеевдин төрагалыгында “Өзгөн күрүчү” брендинин эл аралык стандарттарга ылайык даярдалган жаңы вакуумдук таңгактагы продукциясынын бет ачары болуп өттү. Иш-чарага күрүч өндүрүүчүлөрдүн, соода түйүндөрүнүн, Кыргызстандын Өзбекстандагы жана Кытай Эл Республикасындагы соода өкүлчүлүктөрүнүн, Экономика жана коммерция министрлигинин алдындагы “Кыргыз экспорт” экспортту өнүктүрүү жана илгерилетүү борборунун өкүлү жана башкалар катышты. Бул тууралуу Айыл чарба министрлигинен билдиришти.
Маалыматка таянсак, Ош облусунун жана Ош шаарынын“Региондук экономикалык өнүгүү” долбоорунун алкагында Өзгөн районундагы “Күрүч өндүрүү жана кайра иштетүү”агрокластерине 60 млн сом өлчөмүндө колдоо көрсөтүлдү. Каражатка күрүч жыйноочу комбайндар, тракторлор жана башка айыл чарба техникалары алынууда. Бул колдоо айыл чарба өндүрүшүнүн көлөмүн көбөйтүүгө, күрүчтү кайра иштетүү мүмкүнчүлүктөрүн кеңейтүүгө жана “Өзгөн күрүчү” брендин ички жана тышкы рынокторго чыгарууга багытталган.
“Биздин негизги максат - айыл чарба өндүрүүчүлөрүн өндүрүш баскычында гана эмес, продукцияны кайра иштетүүдө, сатууда жана жаңы рынокторго чыгарууда да колдоо көрсөтүү. “Өзгөн күрүчү” чоң потенциалга ээ ата мекендик бренд, аны өнүктүрүү жана экспорттук мүмкүнчүлүктөрүн кеңейтүү боюнча иштер улантылат”, - деп белгиледи Мирбек Дүйшеев.
