ДКО-2026: майыптыгы бар адамдарга 100гө жакын кызматкер көмөктөшөт
Эмгек, социалдык камсыздоо жана миграция министрлигинин 100гө жакын кызматкери VI Дүйнөлүк көчмөндөр оюндарынын жүрүшүндө майыптыгы бар адамдарга көмөк көрсөтүүгө тартылды. Бул тууралуу ведомствонун басма сөз кызматы билдирди.
1-сентябрдан 6-сентябрга чейин адистер консультация берип, иш-чаралар өтүүчү аймакта багыт алууга жана жүрүп-турууга көмөктөшөт.
Майыптар арабасын колдонгон адамдар үчүн "Газпром" спорт комплексинин аймагында иш-чаралар өтүүчү жайларга жеткирүүчү атайын транспорт уюштурулган.
Мындан тышкары, иш-чаралар өтүүчү жайларда атайын көрсөтмө белгилер орнотулган. Жарандар кызматкерлерди оңой таанып, жардам сурап кайрыла алышы үчүн алар министрликтин логотиби түшүрүлгөн атайын жилеттер менен иштеп жатышат.
Министрликтен белгилешкендей, негизги максат — майыптыгы бар адамдар үчүн Көчмөндөр оюндарынын алкагындагы иш-чараларга катышууга жеткиликтүү, ыңгайлуу жана коопсуз шарт түзүү.
