Дүйнөлүк көчмөндөр оюндарында 507 адам медициналык жардам алды
VI Дүйнөлүк көчмөндөр оюндарында медициналык кызмат үзгүлтүксүз көрсөтүлүүдө. Бул тууралуу Саламаттык сактоо министрлигинин басма сөз кызматы билдирди.
Маалыматка ылайык, 27-августтан 2-сентябрга чейин оюндар өтүп жаткан аймактарда 507 адам медициналык жардам алуу үчүн кайрылган.
Катышуучуларга, конокторго, көрүүчүлөргө жана кызматкерлерге жардам көрсөтүү үчүн негизги аянтчаларда медициналык жайлар, тез жардам жана мобилдик госпиталдар иштеп жатат.
Белгиленгендей, кайрылгандардын көпчүлүгүнө зарыл медициналык жардам окуя болгон жерде көрсөтүлгөн.
Саламаттык сактоо министринин орун басары Гүлбара Ишенапысова катышуучуларды жана конокторду ден соолугу начарлаган учурда медициналык жайларга өз убагында кайрылууга чакырды.
