Интернетке тараган видеодон кийин Арал коктусу таштандыдан тазаланды
Ысык-Көл районунун Семеновка айылындагы Арал коктусуна мыйзамсыз ташталган курулуш жана башка таштанды калдыктары тазаланды. Бул тууралуу Жаратылыш ресурстары министрлигинин Экологиялык жана техникалык көзөмөл кызматы билдирди.
Маалыматка ылайык, интернет булактарына тараган видеонун негизинде Экологиялык жана техникалык көзөмөл кызматынын Ысык-Көл регионалдык башкармалыгы жеринде ыкчам кароо иштерин жүргүзгөн.
Анын алкагында атайын комиссия түзүлүп, ага Экологиялык жана техникалык көзөмөл кызматынын, Экотехмилициянын, Ысык-Көл райондук мамлекеттик администрациясынын жана жергиликтүү бийликтин өкүлдөрү катышты.
Жүргүзүлгөн иштердин жыйынтыгында Арал коктусуна мыйзамсыз ташталган курулуш жана башка таштанды калдыктары толугу менен тазаланып, аймак иретке келтирилди.
Мыйзамсыз таштанды таштоо фактысы боюнча тиешелүү тарапка мыйзамда белгиленген тартипте чара көрүлөрү белгиленди.
