Көк-Жардагы 750 орундуу жаңы мектеп 12-сентябрда ачылат
Бишкек шаарындагы Көк-Жар айылында 750 орундуу жаңы мектептин курулушу аяктоо алдында турат. Бул тууралуу Курулуш, архитектура жана турак жай-коммуналдык чарба министрлигинен билдиришти.
Мектептин курулушу быйыл февраль айында башталган. Жаңы билим берүү мекемесин Эгемендүүлүктүн 35 жылдыгына карата 12-сентябрда пайдаланууга берүү пландалууда.
Долбоорго ылайык, жалпы аянты 3 348,9 чарчы метрди түзгөн үч кабаттуу имарат курулду. Анда заманбап окуу класстары, лабораториялар, китепкана, ашкана жана азык-түлүк сактоочу кампа, компьютердик жана эмгек класстары, жыйындар залы, ошондой эле спорт залы каралган.
Учурда курулуш иштеринин соңку этабы аткарылууда. Курулуш-монтаждоо иштеринин сапаты жана ар бир этабы министрликке караштуу тиешелүү департаменттер тарабынан көзөмөлдөнүүдө.
Белгилей кетсек, мындан тышкары Бишкек шаарында республикалык бюджеттин эсебинен дагы 19 мектеп курулууда. Бул долбоорлор борбор калаадагы мектептердеги орун тартыштыгын азайтууга жана окуучулар үчүн заманбап шарттарды түзүүгө багытталган.
