Кырчында "Көчмөндөр ааламы: Жандуу мурас" этно-шаарчасы ачылды
Министрлер Кабинетинин төрагасы Адылбек Касымалиев VI Дүйнөлүк көчмөндөр оюндарынын алкагында Кырчын жайлоосунда уюштурулган "Көчмөндөр ааламы: Жандуу мурас" этно-шаарчасынын ачылыш аземине катышты.
Өкмөттүн басма сөз кызматынан билдиришкендей, иш-чаранын алдында Адылбек Касымалиев президенттин облустардагы ыйгарым укуктуу өкүлчүлүктөрү тарабынан орнотулган боз үй комплекстерин көрүп чыкты.
Ачылыш аземинде сөз сүйлөгөн Минкаб төрагасы Дүйнөлүк көчмөндөр оюндарынын маанисине токтолуп, Кырчында көчмөн цивилизациясынын тарыхын, маданиятын, каада-салтын жана өнөрүн бириктирген өзгөчө мейкиндик түзүлгөнүн белгиледи.
Анын айтымында, этно-шаарча жана ага алып баруучу жаңыланган жол бир гана иш-чара үчүн курулган эмес. Жаңы инфраструктура мындан ары туризмди өнүктүрүүгө жана ата-бабалардын мурасын таанытууга кызмат кылат.
Этно-шаарчада кыргыз боз үйлөрү тигилип, улуттук кийимдер, элдик кол өнөрчүлүк, салттуу оюндар, каада-салттар жана улуттук музыка кеңири көрсөтүлүүдө.
Адылбек Касымалиев "Жандуу мурас" түшүнүгү ата-бабалардан калган өнөрдү сактап гана тим болбостон, аны күнүмдүк турмушта улантууну билдирерин белгиледи.
Ошондой эле ал Дүйнөлүк көчмөндөр оюндарынын маанилүү максаттарынын бири — ата-бабалардын бай мурасын сактап, аны келечек муундарга өткөрүп берүү экенин айтты.
