Таластын Май айылында 150 орундуу жаңы мектеп ачылат
Жаңы окуу жылына карата Талас облусунун Манас районундагы Май айылында Б. Узенов атындагы 150 орундуу жаңы мектеп пайдаланууга берилет. Бул тууралуу Курулуш министрлигинен билдиришти.
Мектептин курулушу республикалык бюджеттен каржыланып, объекттин жалпы наркы 90 миллион сомду түздү.
Долбоорго ылайык, эки кабаттуу мектепте окуучулардын заманбап шартта билим алуусу үчүн бардык зарыл шарттар түзүлгөн. Анда окуу класстары, лаборатория, китепкана, ашкана, компьютердик класс жана спорт залы каралган. Мектептин жалпы аянты 1281 чарчы метрди түзөт.
Курулуш иштеринин жүрүшү Турак жай-жарандык курулуш департаменти тарабынан көзөмөлдөнүп, аткарылган иштердин сапаты жана белгиленген талаптарга шайкештиги текшерилди.
