Акыйкатчы: Коомдук кеңеш институттун ишмердүүлүгүнө эксперттик колдоо көрсөтөт
Акыйкатчы институтунун демилгеси менен адам укуктары жана эркиндиктери боюнча коомдук кеңеш түзүлүп, анын алгачкы отуруму өттү. Бул тууралуу аталган мекеменин басма сөз кызматы билдирди.
Маалыматка ылайык, отурумда адам укуктарын коргоо жана камсыз кылуу жаатындагы орчундуу маселелер талкууланып, коомдук кеңештин ишинин артыкчылыктуу багыттары аныкталды.
Акыйкатчы Жамиля Жаманбаева коомдук кеңештин түзүлүшү институттун жарандык коом, адистер жана укук коргоо уюмдары менен кызматташтыгын күчөтүүгө багытталганын белгиледи. Анын айтымында, кеңештин курамына адам укуктарын коргоо жаатында тажрыйбасы бар адистер кирди.
Отурумда "Балдардын укугун коргоочулар лигасы" коомдук фондунун директору Назгүл Турдубекова коомдук кеңештин төрагасынын орун басары болуп шайланды.
Турдубекова Акыйкатчы институтунун жарандардын кайрылууларына ыкчам чара көрүү жана бузулган укуктарды калыбына келтирүү боюнча иштерин белгилеп, аймактардагы мониторингдерди коомдук кеңештин мүчөлөрү менен биргеликте өткөрүүнү сунуштады.
Ал эми укук коргоочу Гүлшайыр Абдирасулова БУУнун Адам укуктары боюнча комитетинин сунуштамаларын аткарууга, ошондой эле жарандардын жеке маалыматтарын коргоо жана экологиялык укуктарын камсыз кылуу маселелерине көңүл бурууну сунуштады.
Акыйкатчы коомдук кеңештин сунуштары мамлекеттик органдарга сунуштамаларды даярдоодо жана жарандардын укуктарын коргоо боюнча чараларды иштеп чыгууда эске алынарын билдирди.
