Бишкекте мыйзамсыз кыйылган бактардан 24 миң сомго жакын зыян аныкталды
Бишкекте Бүбүсара Бейшеналиева атындагы кыргыз улуттук маданият жана искусство университетинин аймагында бак-дарактар мыйзамсыз кыйылганы аныкталды. Бул тууралуу Жаратылыш ресурстары министрлигинин басма сөз кызматы билдирди.
Маалыматка ылайык, текшерүүнүн жүрүшүндө бак-дарактарды кыюуга уруксат берүүчү тиешелүү документтер жок экени аныкталган. Жаратылышка келтирилген зыян Министрлер Кабинетинин №224 токтомуна ылайык эсептелип, анын жалпы көлөмү 23 906 сомду түздү.
Аталган мыйзам бузуу фактысы боюнча чогултулган материалдар укуктук баа берүү жана мыйзамда белгиленген тартипте тиешелүү чараларды көрүү үчүн укук коргоо органдарына жөнөтүлөт.
