Кара-Көлдө айыл чарба жерине мыйзамсыз салынган объект боюнча иш козголду
Жалал-Абад облусунун Кара-Көл шаарында айыл чарба багытындагы жер тилкесине тиешелүү уруксат документтери жок курулган мыйзамсыз объект буздурулду. Бул тууралуу калаа жетекчилигинен билдиришти.
Маалыматка ылайык, аталаган жердин жалпы аянты 152 чарчы метрди түзөт. Учурда мыйзамсыз курулуш буздурулуп, жер тилкеси баштапкы абалына келтирилди.
Бул факты боюнча Кылмыш-жаза кодексинин 212-беренеси менен кылмыш иши козголуп, учурда тергөө иштери жүрүп жатат.
Мэрия мыйзамсыз курулуштарга байланыштуу иштер мындан ары да улантыларын билдирип, жарандарды жер тилкелерин пайдаланууда мыйзам талаптарын сактоого жана уруксат кагазы жок иш жүргүзбөөгө чакырды.
