Көчмөндөр оюндарына келгендерге дарыгерлер бир катар сунуштарды берди
Дүйнөлүк көчмөндөр оюндары өтүп жаткан аянтчаларда медициналык кызматкерлер нөөмөттө болуп, жардамга кайрылган жарандарга тиешелүү медициналык жардам көрсөтүүдө. Бул тууралуу Саламаттык сактоо министрлигинин басма сөз кызматы билдирди.
Дарыгерлердин маалыматына караганда, кайрылуулардын басымдуу бөлүгүн жеңил жаракаттар, кан басымдын жогорулашы, кант диабети жана аллергия сыяктуу өнөкөт оорулардын күчөшү түзүүдө.
Мындан тышкары, аба ырайынын өзгөрүшүнө байланыштуу тамак сиңирүү системасынын бузулушу жана суук тийүүгө мүнөздүү белгилер менен кайрылгандар да бар.
Медициналык кызматкерлер оюндардын бардык негизги аянтчаларында зарыл жардам көрсөтүүгө даяр экенин билдиришти.
Адистер катышуучуларды жана конокторду ден соолугуна кам көрүп, алдын алуу чараларын сактоого чакырып, жылуу жана суу өткөрбөгөн кийим алып жүрүүнү сунушташты.
Өнөкөт оорусу бар жарандар дарыгер жазып берген дарыларын үзгүлтүксүз кабыл алып, керектүү дары-дармектерин өздөрү менен алып жүрүшү керек. Ошондой эле кан басымын жана кандагы канттын деңгээлин көзөмөлдөө маанилүү.
Белгиленгендей, оюндар өтүп жаткан аймактарда, өзгөчө тайгак жана тегиз эмес жерлерде этият болуу, жетиштүү суу ичүү жана тамактанууну өткөрүп жибербөө зарыл.
