Кырчында жаракат алган өспүрүмдүн абалы тууралуу маалымат берилди
Кырчын капчыгайынан түшүп келе жаткан учурда жаракат алган 15 жаштагы өспүрүмдүн абалы туруктуу, учурда ал дарыгерлердин көзөмөлүндө дарылануусун улантууда.
Саламаттык сактоо министрлигинен билдиришкендей, өспүрүм алгач Ысык-Көл райондук жалпы дарыгерлик практика борборуна жеткирилген. Кароодо сокку алган жарааты, төмөнкү эриндин жабыркашы жана баш мээнин чайкалышы аныкталган.
Дарыгерлердин маалыматына ылайык, бейтапта ретрограддык амнезия байкалууда. Ал жаракат алган учурду жана окуянын жагдайларын эстей албай жатат.
Өспүрүм нейрохирург баштаган адистердин кароосунан өтүп, бардык зарыл медициналык изилдөөлөрдөн кийин тиешелүү дарылоо дайындалган.
Бейтап учурда кошумча компьютердик томографиядан (КТ) өтүү үчүн Балыкчы шаарына жеткирилди.
Учурда өспүрүмдүн абалы туруктуу, неврологиялык жана башка патологиялык белгилер аныкталган эмес.
