Кыргызстанда патент алуу жол-жобосун жөнөкөйлөштүрүү сунушталууда
Кыргызстанда патенттөө жол-жоболорун жөнөкөйлөтүү жана өтүнмө ээлеринин административдик жүгүн азайтуу сунушталууда. Тиешелүү «Кыргыз Республикасынын “Патент мыйзамына” өзгөртүүлөрдү киргизүү жөнүндө» мыйзам долбоору коомдук талкууга чыгарылды.
Патенттик маалыматты кагаз түрүндө жарыялоо талабы жоюлат
Мыйзам долбоорунда патентке байланыштуу маалыматтарды «Расмий бюллетенде» кагаз түрүндө милдеттүү түрдө жарыялоо талабын алып салуу сунушталууда. Анын ордуна маалыматтарды мамлекеттик электрондук реестрге киргизүү датасы расмий жарыялоо датасы жана булагы болуп эсептелет деген ченем киргизилет. Маалыматка караганда, бул өзгөртүү патент системасын санариптештирүүгө жана электрондук документ жүгүртүүгө өтүүгө шарт түзөт. Ошондой эле маалыматтын коомчулукка тез жетишин камсыздайт.
Экспертизанын мөөнөттөрү мыйзамда белгиленбейт
Долбоордо патентке өтүнмөлөр боюнча формалдуу экспертизанын эки айлык, маңызы боюнча экспертизанын 18 айлык мөөнөттөрүн мыйзамдан алып салуу сунушталууда. Пайдалуу моделдер боюнча азыркы 10 айлык мөөнөт да өзгөртүлөт. Мындан ары экспертизанын мөөнөттөрү Кыргыз Республикасынын Министрлер Кабинети тарабынан аныкталат.
Мөөнөттөрдү мыйзам алдындагы актыга өткөрүү системанын ийкемдүүлүгүн камсыз кылат. Ыйгарым укуктуу орган техникалык жабдуулар жакшырган же иш жүгү азайган учурда Мыйзамга өзгөртүүлөрдү киргизүүнү талап кылбастан, экспертизанын мөөнөттөрүн ыкчам кыскарта алат.
Өнөр жай үлгүлөрүн каттоо тездетилиши мүмкүн
Мыйзам долбоорунда өнөр жай үлгүлөрүнө маңызы боюнча экспертиза жүргүзүүнү алып салуу да каралган.
Демилгечилер муну өнөр жай үлгүлөрүнүн, башкача айтканда, дизайндардын жашоо цикли салыштырмалуу кыска экендиги менен түшүндүрүшөт. Мода жана сезондук өзгөрүүлөргө байланыштуу жаңы дизайнды рынокко тез чыгаруу бизнес үчүн маанилүү.
Экспертизанын бул түрүн алып салуу дизайнерлерге жана компанияларга укуктук коргоону тезирээк алууга, продукцияны коммерциялаштырууга жана рынокко атаандаштарынан эртерээк чыгууга шарт түзүшү мүмкүн.
Мындан тышкары, өзгөртүүлөр инвестиция тартууга жана ишкердик активдүүлүктү жогорулатууга өбөлгө болот деп күтүлүүдө. Патенттин тезирээк берилиши интеллектуалдык менчикке болгон укуктарды коргоону да күчөтмөкчү.
Мыйзам долбоору кабыл алынган учурда республикалык бюджеттен кошумча каржылоо талап кылынбайт.
Коомдук талкуу 2026-жылдын 18-сентябрына чейин уланат. Мыйзам расмий жарыяланган күндөн тартып 10 күндөн кийин күчүнө кирет.
