Манас шаарындагы №5 мектеп кеңейтилип, окуучулар үчүн шарттар түзүлүүдө
Манас шаарындагы Б.Осмонов атындагы №5 мектептин жаңы кошумча имаратынын курулушу дээрлик аяктап калды. Бул тууралуу калаа жетекчилигинин басма сөз кызматы билдирди.
Жаңы корпус 375 окуучуга ылайыкталып, имаратта окуу жана эмгек класстары, компьютердик класс, лабораториялар, химия, биология жана физика кабинеттеринен тышкары ашкана, китепкана, спорт аянтчасы жана жыйындар залы болот.
Долбоор республикалык казынадан каржыланып, Курулуш министрлигинин көзөмөлүндө ишке ашырылууда.
Билим берүү мекемесинин кошумча имаратынын ачылышы окуучулар үчүн билим алууга ыңгайлуу шарттарды түзүүгө өбөлгө болот.
Белгилей кетсек, Б.Осмонов атындагы №5 мектептин негизги имараты 1965-жылы курулган. Буга чейин мектепте 3000ге жакын окуучу үч нөөмөттө билим алып келген.
