Ноокенде 90,6 млн сомго курулган жаңы мектеп окуучуларды кабыл алат
Жалал-Абад облусунун Ноокен районундагы Кыргызстан айылында 150 орундуу мектептин курулушу толугу менен аяктады. Билим берүү мекемеси жаңы окуу жылында пайдаланууга берилет.
Курулуш министрлигинин басма сөз кызматы билдиргендей, мектептин курулушу 2024-жылы июлда башталган. Долбоордун жалпы наркы 90,6 миллион сомду түзүп, республикалык казынадан каржыланган.
Жалпы аянты 1 281 чарчы метрди түзгөн эки кабаттуу имаратта окуучулардын сапаттуу билим алуусу үчүн бардык зарыл шарттар каралган. Анын ичинде окуу класстары, компьютердик класс, лаборатория, китепкана, ашкана, жыйындар залы, спорт аянтчасы жана эмгек сабактары үчүн кабинеттер бар.
