Бажы кызматынын өкүлдөрү кармалды
КР УКМК КР Министрлер Кабинетинин алдындагы Мамлекеттик бажы кызматынын Түштүк аймагы боюнча ички иликтөө департаменти менен биргеликте КР Кылмыш-жаза кодексинин “Кызмат абалынан кыянаттык менен пайдалануу” беренеси боюнча козголгон кылмыш ишин тергөөнүн алкагында, Мамлекеттик бажы кызматынын "БИМИ Ош сервис" бажылык тариздөө пунктун текшерүү тобунун инспекторлорун (К.У.Т. жана Т.А.М.) кармашты.
Кызматтык текшерүүнүн жүрүшүндө “Ош” бажысынын кызмат адамдары ыйгарым укуктарын кызматтын кызыкчылыгына каршы пайдаланып, тышкы экономикалык ишмердүүлүктүн айрым өкүлдөрү менен алдын ала сүйлөшүп, материалдык сый акы алуу максатында ташылып өтүүчү товарларга тийиштүү бажылык кароо, текшерүү жүргүзүшпөгөн жана алар товарларды туура эмес декларациялоо жолу менен өткөрүп жиберүүгө көмөктөшкөн.
Ошондой эле, мыйзамдарда каралган бажы жол-жоболорунан жана көзөмөлдөн качууга шарт түзүшкөн.
УКМКнын басма сөз кызматынын маалыматына караганда, КР Министрлер Кабинетинин алдындагы Мамлекеттик бажы кызматынын Ош бажысынын кызматкерлеринин мыйзамсыз аракеттери мамлекетке олуттуу материалдык зыян келтирген. Тергөө иштери жүрүп жаткан учурда, кармалгандар КР УКМКнын тергөө абагына камакка алынды.
Учурда КР УКМК кылмыштуу схемага катышкан башка бажы кызматкерлерин аныктоо жана жоопкерчиликке тартуу боюнча иштерди улантууда.
