Чолпон-Атадагы “Чолпон” кинотеатры реконструкциядан кийин ачылды
Чолпон-Ата шаарындагы “Чолпон” кинотеатры реконструкциядан кийин кайрадан ишке берилди. Бул тууралуу Россия-Кыргыз өнүктүрүү фондунун (РКӨФ) башкармалыгынын төрагасы Артем Новиков социалдык тармактагы баракчасында кабарлады.
Новиковдун маалыматына караганда, кинотеатр 1982-жылы курулуп, андан бери капиталдык оңдоп-түзөөдөн өткөн эмес. 2022-жылга карата имарат жараксыз абалга келип, авариялык деп табылган.
“Ушуга байланыштуу РКӨФтүн каржылоосу менен кинотеатр толугу менен жаңыланды. Орундардын саны 200дөн 310го көбөйтүлүп, 5 заманбап кинозал ачылды. Ошондой эле профессионалдык 4K жабдуулары орнотулуп, жаңы жылытуу системасы ишке киргизилди. Эми кинотеатр жыл бою иштей алат”– деп билдирген Артем Новиков маалыматта.
Маалыматка ылайык, “Чолпон” кинотеатры РКӨФ каржылаган аймактардагы алты кинотеатрды реконструкциялоо долбоорунун төртүнчү объектиси. Буга чейин Баткен, Токмок жана Кербен шаарларындагы кинотеатрлар жаңыланып, ишин баштаган.
Новиковдун айтымында, долбоордун максаты — аймактардагы маданий инфраструктураны калыбына келтирип, заманбап кино көрсөтүү мүмкүнчүлүгүн түзүү болуп саналат.
