Кыргыз бажысынын кинологу кызматтык ити менен КМШ мелдешинде үч байгелүү орунду ээледи
Кыргызстандын бажы кызматынын өкүлү Наталья Гладкова «Фрея» аттуу кызматтык ити менен КМШга мүчө мамлекеттердин бажы кызматтарынын кинологиялык бөлүмдөрүнүн арасында өткөн XIV мелдеште үч байгелүү орунга ээ болду. Бул тууралуу КРнын Бажы кызматынан маалдымдашты.
Билдирүүгө караганда, мелдеш 2026-жылдын 24–28-августунда Алматы шаарында өтүп, ага Кыргызстандын, Казакстандын, Россиянын жана Беларусиянын бажы кызматтарынын өкүлдөрү катышкан.
Наталья Гладкова - Кыргыз Республикасынын Мамлекеттик бажы кызматынын Адистештирилген окутуу бажысынын Кинологиялык даярдоо бөлүмүндө улук инспектор болуп иштейт. Мелдештин жыйынтыгында ал:
- «Жүктөн баңгизат каражаттарын издөө» номинациясында — 2-орун;
- «Жеңил автотранспорттон баңгизат каражаттарын издөө» номинациясында — 3-орун;
- жалпы жеке эсепте — 2-орунду ээледи.
Мелдештин алкагында «Бажы органдарынын ишмердигинде кызматтык иттерди колдонуу» темасында семинар да уюштурулду. Анда катышуучулар кесиптик тажрыйбалары менен бөлүшүп, кызматтык иттерди даярдоонун заманбап ыкмаларын талкуулашты.
