Кыргызстандын үч облусунда жаңы ичүүчү суу системаларын курууга даярдык иштери уланууда
Ичүүчү суу менен камсыздоо жана саркынды сууларды чыгарууну өнүктүрүү департаменти тарабынан Ош, Чүй жана Ысык-Көл облустарынын 130 айылын таза ичүүчү суу жана заманбап санитардык кызматтар менен камсыздоого багытталган “Ичүүчү суу менен камсыздоого жана санитарияга жалпы жеткиликтүүлүк” (1-фаза) программасы активдүү ишке ашырылууда.
Суу ресурстары, айыл чарба жана кайра иштетүү өнөр жайы министрлигинин маалыматына ылайык, программанын жыйынтыгында 450 миңден ашуун тургун таза ичүүчү сууга жеткиликтүү болот.
Департаменттин Долбоорду ишке ашыруу тобунун аймактык адистери жаңы суу менен камсыздоо системалары курула турган райондордо жергиликтүү өз алдынча башкаруу органдары жана муниципалдык ишканалар менен биргеликте курулуш-монтаждоо иштерине даярдык көрүү боюнча координациялык иштерди жүргүзүп жатышат.
Мындан тышкары, долбоордун алкагында жана ичүүчү суу секторунда жүргүзүлүп жаткан реформаларга ылайык, республиканын 8 районунда ичүүчү суу менен камсыздоо жана саркынды сууларды чыгаруу кызматтарын көрсөтүүчү райондук кызмат көрсөтүүчү адистештирилген муниципалдык ишканалар түзүлүүдө.
Ошондой эле жолугушуулар өткөрулүп, тургундарга долбоордун максаттары жана милдеттери тааныштырылып, жаңы суу менен камсыздоо системасынын курулушу, ишке ашыруу мөөнөттөрү, үй чарбаларын туташтыруу жана инфраструктураны өнүктүрүү боюнча түшүндүрмөлөр берилүүдө. Анын жүрүшүндө жеринде суу менен камсыздоо системаларына техникалык кароо жүргүзүлүп, учурдагы көйгөйлөр, объекттердин абалы жана кызмат көрсөтүүчү муниципалдык ишканалардын туруктуу иштөөсүнө байланышкан маселелер талкууланууда.
