Таласта базарлар жана айрым соода түйүндөрү эки күнгө жабылат
Талас шаарында 10–11-сентябрь күндөрү борбордук базар жана бир катар соода түйүндөрү убактылуу жабылат. Бул тууралуу Талас шаарынын мэриясынан билдиришти.
Мэриянын маалыматына ылайык, чектөө санитардык иштерге байланыштуу киргизилүүдө. Эки күнгө кийим-кече, курулуш материалдары жана автоунаа тетиктери сатылган дүкөндөр, ошондой эле дөңгөлөк оңдоочу жайлар жана башка соода түйүндөрү жабылат.
Ал эми кафе, коомдук тамактануучу жайлар жана азык-түлүк дүкөндөрү кадимки тартипте иштей берет.
Ушуга байланыштуу жергиликтүү бийлик - тургундарды керектүү товарларын алдын ала сатып алууга чакырууда.
Белгилей кетсек, 11-сентябрда Таласта дүйнөлүк жылдыздардын катышуусунда Эгемендүүлүк күнүнө арналган масштабдуу майрамдык иш-чара өтүшү күтүлүп жатат.
