VI Дүйнөлүк көчмөндөр оюндарынын жабылыш аземи өттү
6-сентябрда Чолпон-Ата шаарында VI Дүйнөлүк көчмөндөр оюндарынын жабылыш аземи болуп өттү. Ага катышкан Министрлер Кабинетинин Төрагасы - Адылбек Касымалиев VI Дүйнөлүк көчмөндөр оюндарынын ийгиликтүү өтүшү менен Кыргыз Республикасынын Министрлер Кабинетинин атынан жалпы кыргызстандыктарды, оюндардын катышуучуларын жана бардык конокторду, ошондой эле жеңүүчүлөрдү куттуктады
“ Көчмөн дүйнө – бул өзүнүн мамлекеттүүлүгү, дүйнө таанымы, нарк-насили, акылмандыгы, искусствосу, адам менен табияттын эриш-аркак жашоо маданияты бар улуу цивилизация. Мындан он эки жыл мурда Ысык-Көлдө башталган Дүйнөлүк көчмөндөр оюндары улам канат жайып, Түркияда, Казакстанда уланып, дүйнөлүк маданий-спорттук кыймылга айланды. Бүгүн ал өз мекенине мурдагыдан да чоң масштабда кайтып келип, дүйнөнүн жүздөн ашуун мамлекетинин өкүлдөрүнүн башын бириктирди”, — деди МинКаб Төрагасы Адылбек Касымалиев.
Касымалиев - көчмөндөр оюндары Олимпиада, футбол боюнча дүйнө чемпионаты сыяктуу дүйнө эли кызыгуу менен күткөн ири спорттук окуяларга үзөңгүлөш болуп бара жатканын, Дүйнөлүк спорт жана маданият мейкиндигинде жаңы чоң күч пайда болгонун белгиледи.
Белгилей кетсек, VI Дүйнөлүк көчмөндөр оюндарынын ачылышы үстүбүздөгү жылдын 31-августунда жаңы курулган Бишкек аренада Шанхай кызматташтык уюмунун саммитине катышуу үчүн Кыргызстанга келген бир катар мамлекеттердин башчыларынын катышуусунда болуп, оюндар алты күнгө уланды.
Дүйнөлүк коомчулукта бул Оюндарга чоң кызыгуу пайда болуп, эл аралык уюмдардын, дүйнөлүк спорт жана маданият коомчулугунун, жалпыга маалымдоо каражаттарынын көңүлү Кыргызстанга бурулду. Дүйнөлүк көчмөндөр оюндары өз тарыхынын кийинки барагын Татарстан Республикасында (Россия Федерациясы) ачат.
