8-сентябрь КРнын Финансылык чалгындоо мамлекеттик кызматынын кесиптик майрамы
КРнын Министрлер Кабинетинин Төрагасы Адылбек Касымалиев бүгүн Финансылык чалгындоо мамлекеттик кызматынын кызматкерлерин кесиптик майрамы менен куттуктады.
Куттуктоодо төрага Финансылык чалгындоо мамлекеттик кызматы - Кыргыз Республикасынын финансылык жана экономикалык коопсуздугун камсыз кылуунун улуттук системасында маанилүү орунду ээлеп келе жаткандыгын билдирди:
“Жогорку кесипкөйлүгүңүздөрдүн, компетенттүүлүгүңүздөрдүн, аналитикалык потенциалыңыздардын жана ишке жоопкерчиликтүү мамилеңиздердин аркасында сиздер кылмыштуу кирешелерди адалдоого жана терроризмди каржылоого каршы күрөшүүгө, финансылык ачык-айкындуулукту камсыз кылууга жана өлкөнүн финансылык системасынын туруктуулугун бекемдөөгө олуттуу салым кошуп келесиздер”.
Ошондой эле 20 жылдан ашуун тарыхы бар жамаатты кесипкөйлүгү жана өз ишине берилгендиги далилденип жаткандыгын билдирди.
“Бүгүнкү күндө Финансылык чалгындоо мамлекеттик кызматы КРнын мамлекеттик органдары, чет өлкөлүк өнөктөштөр жана эл аралык уюмдар менен натыйжалуу кызматташып келген абройлуу мамлекеттик орган болуп саналат. Кылмыштуу кирешелерди адалдоого жана терроризмди каржылоого каршы күрөшүүнүн улуттук системасын мындан ары чыңдоодо КРнын Кылмыштуу кирешелерди легалдаштырууга (адалдоого) жана терроризмди каржылоого каршы аракеттенүү боюнча Евразиялык топтун өз ара баалоосунун үчүнчү раундунан өтүшү өзгөчө мааниге ээ” - деп билдирди Адылбек Касымалиев.
Ошондой эле Финансылык чалгындоо мамлекеттик кызматынын жалпы жамаатына бекем ден соолук, жаркын жашоо, иштерине ийгилик жана жаңы жетишкендиктерди каалады.
КРнын Өкмөтүнө караштуу Финансылык чалгындоо мамлекеттик кызматы - кылмыштуу кирешелерди легализациялоого (адалдоого) жана террористтик же экстремисттик ишти каржылоого каршы аракеттенүү боюнча ыйгарым укуктуу мамлекеттик орган болуп саналат.
