Бишкекте 3 эм төрөлдү. Эненин боюнда 4 эм болуп, төртүнчүсү өспөй калган
Бүгүн, Улуттук эне жана баланы коргоо борборунун Перинаталдык борборунда өзгөчө татаал кош бойлуулуктагы аялга кесарево жолу менен операция жасалды. Аялдын кош бойлуулугу алгач төрт эм болгон жана табигый жол менен, ЭКОнун жардамысыз жаралган.
Кош бойлуулуктун 19-жумасында түйүлдүктөрдүн бири өнүгүүсүн токтоткон. Калган кош бойлуулукту дарыгерлер тыкыр көзөмөлдөп, сактап калуу үчүн акушердик пессарий, жатын моюнчасына тигиш салуу жана прогестерон терапиясын колдонушкан.
Дарыгерлердин туура тандалган тактикасынын жана үзгүлтүксүз көзөмөлүнүн натыйжасында кош бойлуулукту 35-жумага чейин жеткирүүгө мүмкүн болгон. Натыйжада, бүгүн эки уул жана бир кыз жарык дүйнөгө келди. Наристелердин төрөлгөндөгү салмагы:
1) уул — 2350 грамм
2) уул — 2600 грамм
3) кыз — 2340 грамм.
Операцияны профессор Арсен Аскеров жасады. Учурда эне жана наристелер дарыгерлердин көзөмөлүндө. Абалдары туруктуу.
