Бишкекте киберкоопсуздук боюнча улуттук фестиваль өтөт
22-сентябрда Бишкектеги “Жаштык Арена” аянтчасында Кыргызстандын киберкоопсуздугуна арналган улуттук “CYBERNOMAD FEST 2026” фестивалы өтөт. Мындай маалыматты УКМКнын басма сөз кызматты жарыялады.
Билдирүүгө караганда, иш-чарага мамлекеттик органдардын, маанилүү маалыматтык инфраструктуранын субъекттеринин, банктардын жана каржы уюмдарынын, телекоммуникациялык жана IT-компаниялардын, билим берүү мекемелеринин, эл аралык уюмдардын жана эксперттик коомчулуктун өкүлдөрүнөн турган 700дөн ашык катышуучу келет.
Фестивалдын негизги максаты — өлкөнүн кибертуруктуулугун бекемдөө, адистердин практикалык компетенцияларын өнүктүрүү жана мамлекет, бизнес, эксперттик жана академиялык коомчулуктун өз ара кызматташтыгын күчөтүү болуп саналат.
Иш-чаранын алкагында төрт негизги багыт уюштурулат: Cyber Conference — киберкоопсуздук боюнча баяндамалар жана талкуулар, Cyber EXPO — 30дан ашык экспонент катышкан технологиялар көргөзмөсү, Cyber Nomad CTF — практикалык кибермашыгуулар жана мелдештер, ошондой эле Networking Hub — ишкердик жана кесиптик байланыштарды түзүү аянтчасы.
Мындан тышкары, атайын киберполигоондо киберчабуулдарды моделдөө жана кайтаруу, инциденттерди талдоо жана аларга чара көрүү механизмдерин иштеп чыгуу боюнча практикалык машыгуулар өткөрүлөт.
